Гомельскі пробашч жадае жанчынам Божага дабраславення і святасці сэрца [+ вясновае відэа]

Пробашч гомельскай рыма-каталіцкай парафіі айцец Славамір Ласкоўскі віншуе ўсіх, хто святкуе Міжнародны жаночы дзень, і жадае Божага дабраславення і святасці сэрца.

Не варта памыляцца, думаючы, што сучасныя дзяўчаты і жанчыны, якія жывуць у сваіх сем'ях і выхоўваюць дзяцей, не могуць стаць святымі. Пакліканне кожнага хрысціяніна да святасці ніколі не страціць актуальнасць.

У Каталіцкай царкве ёсць нямала прыкладаў святасці жанчын, як сярод законніц, так і сярод свецкіх. Напрыклад, гэта жанчыны, якія ахвяравалі сваім жыццём дзеля нараджэння дзіцяці.

Кожны пакліканы і да святасці ў паўсядзённых справах: на працы, у падрыхтоўцы ежы, ўборцы дома, выхаванні дзяцей. Выконваючы ўсё гэта з любоўю і дзеля сваіх блізкіх, мы ідзем да сапраўднай святасці. Хай для ўсіх дзяўчат і жанчын заўсёды будзе прыкладам Найсвяцейшая Панна Марыя.

Наш маленькі падарунак жанчынам - гэты мілы відэаролік, на якім мы зафіксавалі надыход вясны. Няхай ваша сэрца ажывае гэтак жа, як і вясновая прырода!